गोरेगाव येथील फिल्मसिटीमध्ये आज पहाटेच्या सुमारास भीषण आग लागल्याची घटना समोर आली आहे. 'अनुपमा' या लोकप्रिय मालिकेच्या सेटला ही आग लागली असून, संपूर्ण सेट जळून खाक झाला आहे. आगीची माहिती मिळताच अग्निशमन दलाच्या अनेक गाड्या तातडीने घटनास्थळी दाखल झाल्या आणि त्यांनी अथक प्रयत्न करून आग आटोक्यात आणली आहे. सध्या कुलिंगचे काम सुरू असून आगीवर पूर्णपणे नियंत्रण मिळवण्यात यश आलं आहे.

सुदैवानं या आगीत कुणीही जखमी किंवा जीवितहानी झाली नाही.आग नेमकी कशामुळे लागली याचा तपास अग्निशमन दलाचे अधिकारी करत आहेत. या आगीमुळे प्रचंड आर्थिक नुकसान झाल्याची शक्यता व्यक्त केली जात आहे. या दुर्घटनेमुळे मालिकेच्या चित्रीकरणावर मोठा परिणाम होण्याची शक्यता आहे.