सरकारी कोट्यातून फ्लॅट मिळवण्यासाठी बनावट कागदपत्रे तयार करून फसवणूक केल्याप्रकरणी आणि वादग्रस्त विधानामुळे या आधी अनेकदा अडचणीत सापडलेले राज्याचे कृषिमंत्री माणिकराव कोकाटे तथा सिन्नर विधानसभा मतदारसंघाचे आमदार हे नव्या वादात सापडले आहेत. आताच संपलेल्या पावसाळी अधिवेशानामध्ये विधानसभा सभागृहात कामकाज सुरू असताना कोकाटे यांचा मोबाइलवर रमी हा पत्त्यांचा ऑनलाईन गेम खेळतानाचा व्हिडिओ समोर आला होता.

हा व्हिडिओ आमदार रोहित पवार यांनी ट्विट केल्यानंतर राज्यभरातून संतापाची लाट उसळली होती. शेतकऱ्यांचे गंभीर प्रश्न असताना कृषिमंत्र्याचा हा व्हिडिओ समोर आल्याने विरोधकांनी त्यांना चांगलेच धारेवर धरले आहे. यानंतर आता राष्ट्रवादीचे प्रदेशाध्यक्ष सुनील तटकरे यांनी त्यांच्यावर राष्ट्रीय अध्यक्ष प्रफुल पटेल हे निर्णय घेतील असे सुतोवाच केल्यानंतर त्यांचा राजीनामा घेतला जाऊ शकतो अशी राजकीय सूत्रांनी माहिती दिली आहे.