महाराष्ट्रातील दुष्काळ आणि शेतकऱ्यांच्या गंभीर प्रश्नांवरून शिवसेना नेते संजय राऊत यांनी राज्य सरकारवर तीव्र शब्दांत टीका केली आहे. मुख्यमंत्र्यांसह दोन्ही उपमुख्यमंत्र्यांना दुष्काळग्रस्त शेतकऱ्यांची काहीही पडलेली नाही, असा आरोप राऊत यांनी केला आहे. त्यांचे लक्ष केवळ आपले साखर कारखाने, ठेकेदारी आणि कमिशनबाजी याकडेच केंद्रित आहे, असे राऊत यांनी म्हटले आहे.

राऊत यांनी दावा केला की, ठेकेदारांच्या मदतीने राज्याची मोठ्या प्रमाणावर लूट केली जात आहे. ठेकेदारांचे 95 हजार कोटी रुपयांचे देयके अजूनही प्रलंबित आहेत. या पार्श्वभूमीवर, मुख्यमंत्र्यांनी राज्याच्या विविध विभागांना खर्चात किमान 20% कपात करण्याच्या सूचना दिल्या असल्या तरी, मुख्यमंत्री, उपमुख्यमंत्री आणि मंत्र्यांचा सध्याचा थाट पाहता, राज्यावर खरोखरच 11 लाख कोटी रुपयांचे कर्ज आहे का, असा प्रश्न पडतो, असे राऊत यांनी नमूद केले. ते म्हणाले की, सर्व काही थाटामाटात आणि व्यवस्थित सुरू आहे, फक्त गरिबांना रोजगार आणि रोजीरोटी मिळू दिली जात नाही.