विधिमंडळाच्या हिवाळी अधिवेशनाला आजपासून नागपूरमध्ये सुरुवात झाली आहे. या अधिवेशनाच्या झालेल्या चहापानावर विरोधकांनी बहिष्कार टाकला होता. त्यामुळे अधिवेशन आणखीनच तापण्याची शक्यता आहे. दरम्यान गेल्या अनेक दिवसांपासून विदर्भातील नागरिकांकडून वेगळ्या विदर्भाची मागणी लावून धरली जात आहे. मात्र या मागणीकडे नेहमची दुर्लक्ष केले जाते. त्यामुळे आता पुन्हा एकदा वेगळ्या विदर्भाचा मुद्दा तापला आहे. काँग्रेसचे नेते आणि माजी मंत्री विजय वडेट्टीवार यांनी अधिवेशन सुरू होण्याच्या एक दिवसाआधीच वेगळ्या विदर्भाची मागणी करत पुन्हा एकदा या मुद्यावरून राजकारणाचे तापमान वाढवले आहे. यावरच राज्याचे महसूलमंत्री चंद्रशेखर बावणकुळे म्हणाले, वेगळ्या विदर्भावर आम्ही काम करत आहोत. हा अजेंडा कायम असल्याचे ते म्हणाले.