राजकीय वर्तुळातून मोठी बातमी समोर आली आहे. शिवसेना ठाकरे गटाचे खासदार संजय राऊत हे राज ठाकरे यांच्या भेटीसाठी दाखल झाले आहेत. राज ठाकरे यांच्या शिवतीर्थ निवासस्थांनी दोन्ही नेत्यांमध्ये बैठक सुरू आहे. या बैठकीमध्ये अनेक महत्वाच्या मुद्द्यांवर चर्चा केली जाण्याची शक्यता आहे.

गेल्या काही दिवसांपासून मराठी भाषेचा मुद्दा सध्या महत्वाचा ठरत आहे. मराठी भाषेच्या मुद्द्यावरच आजच्या बैठकीत दोन्ही नेत्यांमध्ये चर्चा होण्याची माहिती समोर आली आहे. महिला विधेयकाबाबत राज ठाकरे यांनी मांडलेली भूमिका आणि भाजप फोडाफोडीचे राजकारण कसं करतंय यावर देखील चर्चा होणार असल्याचे सांगितले जात आहे. त्यासोबतच, महिला विधेयकाच्या आडून काही गोष्टी भाजपकडून राबवल्या जात असल्याची प्रतिक्रिया राज ठाकरे यांनी दिली होती. त्यांनी दिलेल्या प्रतिक्रियेनंतर संजय राऊत त्यांची भेट घेऊन आभार मानणार असल्याची माहिती समोर आली आहे.