जसजशी विधानसभेची निवडणूक जवळ येत आहे. तसतसे महायुतीत वादाचे फटके फुटण्यास सुरुवात झाली आहे. जागावाटपावरून महायुतीचे नेते एकमेकांविरोधात भूमिका घेत आहेत. शिवसेना शिंदे गटाचे नेते आणि महायुती सरकारमधील आरोग्यमंत्री तानाजी सावंत अडचणीत सापडण्याची शक्यता आहे. कारण त्यांच्याविरोधात अजित पवार यांनी थेट मुख्यमंत्री एकनाथ शिंदे यांच्याकडे तक्रार केल्याची माहिती आहे.

कॅबिनेटमध्ये आम्ही मांडीला मांडी लावून बसलो असलो तरी बाहेर आलो तर उलट्या होतात, असं विधान मंत्री तानाजी सावंत यांनी केलं होतं. आज शुक्रवारी देखील त्यांनी धाराशिव लोकसभेतील उमेदवारीवरून भाष्य केलं आहे.

दरम्यान, मंत्री सावंत हे सातत्याने वाचाळ विधाने करत असून त्यामुळे महायुतीत दुरावा होऊ नये याची काळजी आपण घ्यावी, अशी विनंती उपमुख्यमंत्री अजित पवार आणि राष्ट्रवादी काँग्रेस पक्षाचे प्रदेशाध्यक्ष सुनील तटकरे यांनी मुख्यमंत्री एकनाथ शिंदे यांना केली आहे. त्यामुळे मुख्यमंत्री शिंदे हे मंत्री तानाजी सावंत यांचे चांगलेच कान टोचण्याची शक्यता आहे.