राज्यातील महापालिका निवडणुकांच्या पार्श्वभूमीवर राज्य निवडणूक आयोगाने तयारी सुरू केली आहे. यासंदर्भात विभागीय आयुक्त आणि महानगरपालिका आयुक्तांसोबत व्हिडिओ कॉन्फरन्सिंगद्वारे बैठक घेण्यात आली. या बैठकीला आयोगाचे सचिव सुरेश काकाणी यांच्यासह विविध वरिष्ठ अधिकारी उपस्थित होते.

या बैठकीदरम्यान आयोगाने निवडणूक प्रक्रियेच्या तयारी संदर्भात महत्त्वपूर्ण सूचना दिल्या आहेत. आगामी निवडणुकांसाठी इलेक्ट्रॉनिक मतदान यंत्रांची (EVM) प्राथमिक तपासणी तातडीने पार पाडण्यात यावी, तसेच ही यंत्रे पूर्णपणे कार्यान्वित स्थितीत ठेवावीत, अशा स्पष्ट सूचना आयोगाकडून देण्यात आल्या आहेत.

राज्यभरातील महापालिकांमध्ये निवडणुकीचा बिगुल कधी वाजतो याकडे आता सर्वांचे लक्ष लागले आहे. दरम्यान, निवडणूक आयोगाने केलेल्या हालचालींमुळे निवडणूक प्रक्रियेचा मार्ग मोकळा होत असल्याचे संकेत मिळत आहेत.