महाराष्ट्राच्या राजकारणातून एक अत्यंत खळबळजनक बातमी समोर आली आहे. महायुतीचं सरकार लवकरच कोसळणार असल्याचा मोठा दावा काँग्रेसचे ज्येष्ठ नेते बाळासाहेब थोरात यांनी केला आहे. महायुतीमध्ये अंतर्गत मोठे वाद, अस्वस्थता आणि असंतोष असल्याचं त्यांनी म्हटलंय. सध्या समोर येणारे आरोप-प्रत्यारोप हे महायुतीमधील अंतर्गत खळबळीचा केवळ एक टक्का भाग असल्याचा दावा थोरात यांनी केला आहे. एकमेकांवरील अविश्वासाचे परिणाम लवकरच दिसतील, असंही त्यांनी स्पष्ट केलंय. त्यांच्या या विधानामुळे महाराष्ट्राच्या राजकीय वर्तुळात जोरदार चर्चांना उधाण आलं आहे.

शिक्षक आणि पदवीधर मतदारसंघाच्या निवडणुकीनंतर महायुतीमधील अस्वस्थता थोड्या प्रमाणात उघड झाली असली, तरी पक्षांतर्गत मोठा कलह सुरू आहे. हे सरकार लवकरच पडेल, असा दावा माजी मंत्री आणि काँग्रेसचे ज्येष्ठ नेते बाळासाहेब थोरात यांनी केला आहे. सध्या राज्यात महायुतीमध्ये सुरू असलेले आरोप-प्रत्यारोप उघड झाले असून, अंतर्गत प्रचंड खळबळ माजली आहे. महायुतीमध्ये प्रचंड वाद, अस्वस्थता आणि असंतोष पसरला आहे. राज्याची अर्थव्यवस्था डबघाईला आली आहे; त्यातच दुष्काळ, शेतकऱ्यांना मिळणारी तुटपुंजी मदत, शेतमजुरांकडे झालेले दुर्लक्ष, फसलेल्या योजना आणि भ्रष्टाचार यामुळे हे सरकार येत्या काळात आपोआपच पडेल, असे वक्तव्य बाळासाहेब थोरात यांनी केले.