शेतकऱ्यांसाठी मोठा दिलासादायक निर्णय घेण्यात आला आहे. राज्यातील ३३ जिल्ह्यांतील शेतकऱ्यांच्या खात्यात आज अतिवृष्टी आणि महापुरामुळे झालेल्या नुकसानीची भरपाई जमा होणार आहे. एकूण २१ लाख शेतकऱ्यांना १,३५६ कोटी रुपयांचा निधी वितरित करण्यात येणार आहे. सप्टेंबर महिन्यात राज्यातील अनेक जिल्ह्यांना अतिवृष्टीचा तडाखा बसला होता, ज्यामुळे तब्बल ५२ लाख हेक्टरवरील पिकांचे नुकसान झाले. बीड, सोलापूर, अहिल्यानगर आणि धाराशिव जिल्ह्यांना विशेषतः पुराचा फटका बसला होता. सर्व जिल्ह्यांचे पंचनामे शासनाकडे सादर झाल्यानंतर ही मदत मंजूर करण्यात आली आहे. या निर्णयामुळे सणासुदीच्या काळात शेतकऱ्यांना आर्थिक दिलासा मिळेल, अशी अपेक्षा व्यक्त केली जात आहे.