नंदुरबार जिल्ह्यातील मांडवी खुर्द येथील जिल्हा परिषद शाळेची अवस्था अत्यंत दयनीय झाली आहे. विद्यार्थ्यांना मोडकळीस आलेल्या खोल्यांमध्ये जीव मुठीत धरून शिक्षण घ्यावे लागत आहे. शाळेच्या भिंतींना भेगा पडल्या असून छताला लाकडाचा आधार देऊन ते कसेबसे टिकवले जात आहे. मात्र शाळा निर्लेखित झाल्यानंतरही उपाययोजना होत नसल्याने विद्यार्थ्यांचे भवितव्य धोक्यात आले आहे.

या शाळेत 288 विद्यार्थी शिक्षण घेत आहेत. परंतु एकूण 7 खोल्यांपैकी 5 खोल्या पूर्णतः जीर्ण अवस्थेत आहेत. त्यामुळे विद्यार्थ्यांना जीवाच्या भीतीने शिक्षण घ्यावे लागत आहे. शाळेच्या भिंती व छत कोसळण्याचा धोका निर्माण झाला आहे. शाळेतील विद्यार्थ्यांवर अपघात झाल्यास याला जबाबदार कोण? असा संतप्त सवाल पालकांनी उपस्थित केला आहे. पालकांनी वारंवार शासन व प्रशासनाकडे तक्रारी केल्या असूनही कोणतीही ठोस कारवाई झालेली नाही, असा गंभीर आरोप करण्यात आला आहे.