राष्ट्रवादीचे आमदार रोहित पवारांनी मोठा बॉम्ब टाकलाय. पावसाळी अधिवेशनात सभागृहाचे कामकाज सुरू असताना कृषीमंत्री माणिकराव कोकाटे मोबाईलवर रमीचा डाव मांडल्याचा व्हिडिओ त्यांनी शेअर केलाय. त्यांच्या अधिकृत एक्स खात्यावरून त्यांनी हा व्हिडिओ शेअर केलाय. राज्यात शेतकरी आत्महत्या हा चिंतेचा विषय झालेला असताना कृषी मंत्र्यांच्या या बेजबाबदार वर्तनाने विरोधकच नाही तर शेतकऱ्यांमध्ये संतापाची लाट उसळली आहे. एकीकडे दिवसाला 8 शेतकरी रोज आत्महत्या करत आहे आणि लोकशाहीच्या मंदिरात कृषिमंत्री हे रमीचा डाव खेळत असल्यामुळे राज्यातील जनतेने संताप व्यक्त केला आहे. मात्र कृषिमंत्री कोकाटे यांनी हा आरोप फेटाळला असून विधानपरिषदेमध्ये काय चालले हे बघण्यासाठी मोबाइल काढला होता त्यावेळी स्वीप करत असताना तो गेम ओपन झाला असे कोकाटे म्हणाले.