पुणे जिल्ह्यातील शिरुर तालुक्यातील पिंपरखेड येथे मागच्या पंधरा दिवसात बिबट्याच्या हल्ल्यात तीन बळी गेल्यानंतर शेतात काम करणाऱ्या महिलांनी गळ्यात टोकदार खिळे असलेले पट्टे घातले आहेत. उत्तर पुणे जिल्हा बिबट्याचा हॉटस्पॉट बनला असून बिबट्याच्या हल्ल्यापासून आपलं संरक्षण व्हावे यासाठी महिलांनी अनोखी शक्कल लढवत गळ्यामध्ये टोकदार खिळे असलेले पट्टा घातलाय. बिबट्या प्रामुख्याने मानेवरती हल्ला करतो आणि असे टोकदार खिळे असलेला पट्टा जर गळ्यात असेल तर आपलं संरक्षण होऊ शकतं. ही कल्पना डोक्यात घेऊन महिलांनी हि अनोखी शक्कल लढवलीय. गेल्या काही दिवसांपासून तालुक्यात बिबट्याच्या दहशतीने नागरिक भयभीत झाले असून, पिंपळखेड गावातील महिलांनी स्वतःच्या संरक्षणासाठी एक धक्कादायक उपाय शोधला आहे. 'आम्ही शेतात मोकळं जाऊ शकत नाही, आमच्या मानेवर हल्ला होऊ शकतो, त्यामुळे या पट्ट्यांची गरज आहे,' असं एका स्थानिक महिलेने म्हटलं आहे. बिबट्या थेट मानेवर हल्ला करतो, त्यामुळे शेतात काम करताना गवत कापणे किंवा इतर कामे सुरक्षितपणे करता यावीत यासाठी या महिलांनी टोकदार खिळे असलेले पट्टे गळ्यात घालण्यास सुरुवात केली आहे.