मुख्यमंत्री माझी लाडकी बहीण योजनेत अपात्र ठरून देखील अनेक महिला लाभ सोडताना दिसत नाही आहेत. अपात्र महिलांनी लाभ सोडण्याचं आवाहन सरकारकडून करण्यात आलं आहे. मात्र पुणे जिल्ह्यातील महिला लाभ सोडण्यासाठी फारशा इच्छुक दिसत नसल्याचं बघायला मिळत आहे. फक्त एकाच महिले पुढे येत आपल्याला लाडकी बहीण योजनेचा लाभ नको असल्याचं कळवलं आहे.

महायुती सरकारने आता लाडकी बहीण योजनेच्या निकषात न बसणाऱ्या बहीणींवर कारवाई करण्याचं ठरवल्यानंतर अनेक अर्ज छाननी करून बाद करण्यात येणार असल्याचं सांगण्यात आलं होतं. त्यानंतर सरकारने अपात्र लाडक्या बहिणींना स्वत:हून पुढे येत लाभ सोडण्याची मागणी केली होती. मात्र पुणे जिल्ह्यातील लाडक्या बहिणींना लाभ सोडवत नसल्याचं सध्या दिसत आहे. लाडकी बहीण योजनेसाठी सरकारने जारी केलेल्या निकषात महिलेचं वय १८ ते ६५ वर्षादरम्यान असावं, कुटुंबाचं आर्थिक उत्पन्न अडीच लाखांच्या आत असावं, घरातलं कोणीही सरकारी नोकरीत किंवा इन्कम टॅक्स भरणारं नसावं, संजय गांधी निराधारसारख्या इतर योजनांचं लाभार्थी नसावं, तसंच घरात चारचाकी असणाऱ्या महिला योजनेच्या लाभार्थी नसतील, अशा अटी टाकण्यात आलेल्या आहे. या निकषात न बसणाऱ्या लाभार्थी महिला मात्र आता लाभ सोडत नसल्याचं चित्र पुणे जिल्ह्यात बघायला मिळत आहे.