शेतकरी कर्जमाफीसह विविध मागण्यांसाठी किसान सभेच्या नेतृत्वाखाली निघालेल्या लाल बावट्याच्या लॉंग मार्चचा आज दुसरा दिवस आहे. इगतपुरीमध्ये मुक्काम केल्यानंतर आंदोलकांनी कसारा घाटातून मुंबईच्या दिशेने पायी कूच केली आहे. या मोर्चात शेतकऱ्यांसह हजारो लाडक्या बहिणी आणि श्रमिक सहभागी झाले आहेत. नमो शेतकरी योजनेचे थकीत हप्ते, नियमित कर्जदारांना प्रोत्साहन अनुदान, पीकविमा ट्रिगर पुन्हा लागू करणे, लाडकी बहीण योजनेची e-KYC प्रक्रिया सुरू करणे, तसेच अंगणवाडी, आशा सेविका आणि शालेय पोषण आहार कर्मचाऱ्यांच्या मानधनात वाढ अशा विविध मागण्या आंदोलकांनी केल्या आहेत.