पुण्यातील हवेली तालुक्यातील श्रीराम नगर भागात कोयता गँगने पुन्हा एकदा धुमाकूळ घातल्याचा प्रकार उघडकीस आला आहे. १० जुलै रोजी गुरुवारी रात्रीच्या सुमारास काही इसमांनी धारदार कोयत्याने एक पानटपरीवर अचानक हल्ला चढवला. टपरीमधील साहित्याची तोडफोड करत परिसरात दहशत माजवण्याचा प्रयत्न करण्यात आला.

ही संपूर्ण घटना टपरीवरील सीसीटीव्ही कॅमेऱ्यात कैद झाली आहे. मात्र, आश्चर्याची बाब म्हणजे याबाबत कोणतीही तक्रार पोलिस स्टेशनमध्ये दाखल झालेली नाही. स्थानिकांनी खेड शिवापूर पोलिसांना माहिती दिली असूनही पोलिसांनी स्वतःहून कोणतीही कारवाई केली नसल्यामुळे नागरिकांत तीव्र नाराजी व्यक्त होत आहे.

या हल्ल्यात कोणतीही जीवितहानी झाली नसली तरी संबंधित दुकानदाराचे मोठे आर्थिक नुकसान झाले आहे. त्यामुळे परिसरातील व्यापारी व सामान्य नागरिकांमध्ये भीतीचे आणि असुरक्षिततेचे वातावरण निर्माण झाले आहे. स्थानिक नागरिकांनी पोलिस प्रशासनाकडून तात्काळ चौकशी व कठोर कारवाईची मागणी केली आहे.