मुंबई-गोवा महामार्गावरील खड्डे आणि सततची वाहतूक कोंडी टाळण्यासाठी कोकण रेल्वेने यंदा गणेशोत्सवाच्या पार्श्वभूमीवर खास रो-रो सेवा सुरू करण्याचा निर्णय घेतला आहे. या सेवेअंतर्गत एकावेळी ४० कार रेल्वेतून नेल्या जाणार असून २३ ऑगस्टपासून ही सेवा एक दिवसाआड सुरू राहणार आहे. गाडीला कोकणात नांदगाव रोड येथे एकमेव थांबा असून पुढे गोव्यात वेरणा हा दुसरा थांबा असेल. रत्नागिरी जिल्ह्यात या सेवेला कोणताही थांबा नसल्याने अनेक चाकरमान्यांना अपेक्षित सोय मिळणार नाही. या सेवेचा लाभ घेण्यासाठी मुंबईकरांना अडीच तासांचा प्रवास करून कोलाडला यावं लागणार आहे. त्यातच १६ गाड्यांचे बुकिंग पूर्ण न झाल्यास फेरी रद्द करण्यात येणार आहे. अशा परिस्थितीत आयत्यावेळी फेरी रद्द झाल्यास काय करायचे, हा प्रश्न प्रवाशांसमोर निर्माण झाला आहे. या सर्व अटींमुळे या सेवेचा प्रत्यक्षात किती फायदा होईल, याबाबत चाकरमानी साशंक आहेत. मात्र, कोकण रेल्वे प्रशासनाने महामार्गावरील प्रवासाचा त्रास कमी करण्यासाठी ही सेवा सुरू केल्याचे सांगितले असून, इच्छुकांनी लवकर बुकिंग करावे, असे आवाहन केले आहे.n