डॉन,दहशत,दादा,भाई अन् काय काय बिरुदावल्या लावून दहशत माजवणाऱ्या क्षुल्लक गुंडांची ही रिलगिरी...गुंड म्हणून ओळख निर्माण व्हावी यासाठी हे अल्पवयीन तरुण सध्या रिल्सचा आधार घेतात. असाच धक्कादायक प्रकार कोल्हापुरात घडलायं...त्यामुळे कोल्हापुरात कायदा आणि सुव्यवस्थेचा प्रश्न ऐरणीवर आलाय. 6 ते 7 तरूणांनी आधी कोयता घेऊन चिथावणी खोर रिल्स तयार करून परिसरात दहशत माजवण्याचा प्रयत्न केला. त्यानंतर याच तरूणांनी एकाची निर्घृण हत्या केली. विठ्ठल शिंदे असं मृत तरूणाचं नाव असून, 10 जानेवारीला त्याच्यावर हल्ला करण्यात आला.ही घटना कोल्हापुरातील गांधीनगर परिसरात घडली.

पुण्यातील पिंपरी चिंचवड परिसर कोयता गॅंगसाठी कुप्रसिद्ध असताना आता राज्यातील विविध शहरातून अशा कोयता गँग सक्रिय होतायत...कोल्हापुरात तरुण आणि काही अल्पवयीन मुलांनी कोयता घेऊन हैदोस माजवलाय.. बी के ग्रुप असं कोयता गँगचं नाव असून, यात 5 तरूण आणि 2 अल्पवयीन मुलांचा समावेश आहे. ..याप्रकरणी पोलिसांनी कारवाई करत तातडीने 7 आरोपींचा शोध घेत त्यांना ताब्यात घेतलं. 7 आरोपींपैकी 2 आरोपी अल्पवयीन असून, 5 आरोपी 21 ते 23 या वयोगटातील आहेत. कोल्हापुरात एका बाजूला आरोपींना दुग्धाभिषेक घातला जातोय. तर दुसरीकडे आरोपी वेगवेगळे रिल्स ठेवून दहशत माजवण्याचा प्रयत्न करतायत.. या सर्व प्रकारावरून कोल्हापुरात कायदा आणि सुव्यवस्था आहे की नाही ? असा प्रश्न निर्माण झालाय.