कल्याण पूर्वेतील नांदिवली परिसरात एका बाल चिकित्सालयातील मराठी रिसेप्शनिस्ट तरुणीला डॉक्टराना भेटण्यासाठी आलेल्या परप्रांतीय तरुणाने बेदम मारहाण केल्याची घटना सोमवारी संध्याकाळी ६.३० वाजण्याच्या सुमारास घडली असून याप्रकरणी सदर तरुणीच्या तक्रारीवरून पोलिसांनी गोपाल झा या आरोपी विरोधात गुन्हा दाखल केला आहे.

कल्याण पूर्वेतील एका लहान मुलाच्या क्लिनिक मध्ये सदर तरुणी रिसेप्शनिस्ट म्हणून काम करते. सोमवारी संध्याकाळच्या सुमारास क्लिनिक मधील डॉक्टराच्या केबिनमध्ये एम आर बसल्याने थोडा वेळ रुग्णांना आत पाठवू नको अशा सूचना डॉक्टरांनी दिल्या होत्या. यामुळेच डॉक्टराना भेटण्यासाठी आलेल्या गोपाळ झा या तरुणाला इतर रूग्णा प्रमाणेच या तरुणीने थोडा वेळ थांबण्यास सांगितले.

मात्र तरीही तो ऐकत नसल्याने रिसेप्शनिस्ट तरुणीने आपल्या खुर्चीतून बाहेर येत या तरुणाला आत जाण्यापासून थांबविण्याचा प्रयत्न करताच संतापलेल्या गोपाळ याने धावत येऊन या तरुणीला केसांना धरून बेदम मारहाण केली यामुळे या तरुणीच्या अंगावरील कपडे फाटले. या अचानक झालेल्या हल्ल्याने घाबरलेल्या या तरुणीने गोकुळ विरोधात मानपाडा पोलिसात तक्रार दिली असून या तक्रारी नुसार पोलिसांनी गोकुळ झा विरोधात गुन्हा दाखल करत त्याचा शोध सुरु केल्याचे मानपाडा पोलीस ठाण्याचे वरिष्ठ पोलीस निरीक्षक संदीपान शिंदे यांनी सांगितले.