सिंधुदुर्ग येथील राजकोट येथे उभारण्यात आलेला पूर्णाकृती छत्रपती शिवाजी महाराजांचा पुतळा कोसळल्याची घटना घडली होती. या पुतळ्याचा शिल्पकार जयदीप आपटे याच्या विरोधात गुन्हा दाखल करण्यात आला होता. गुन्हा दाखल केल्यापासून जयदीप आपटे हा पसार होता . सिंधुदुर्ग पोलिसांसह कल्याणचे पोलीस देखील त्याच्या मागावर होते त्याच्या शोधासाठी विविध पथके तयार करण्यात आली होती. बाजारपेठ पोलिसांना आपटे हा त्याच्या कुटुंबीयांना भेटण्यासाठी त्याच्या कल्याणमधील बाजारपेठे येथील घरी येणार असल्याची माहिती मिळाली होती. या माहितीनुसार कल्याण पोलिसांनी कल्याण रेल्वे स्टेशन व जयदीप आपटे यांच्या बाजारपेठ परिसरातील घराच्या परिसरात सापळा रचला होता. पोलिसांनी आपटेला त्याच्या घरी येतानाच अटक केली आहे. आपटेला अटक करून तात्काळ पोलीस उपायुक्त सचिन गुंजाळ यांच्या कार्यालयात हजर केले. सिंधुदुर्ग पोलिसांचे पथक कल्याण डीसीपी कार्यालयात दाखल झाले त्यांनी जयदीप आपटेला ताब्यात घेत सिंधुदुर्गच्या दिशेने ते रवाना झालेत.