अमेरिकेच्या हवाई हल्ल्याच्या पार्श्वभूमीवर इराणनं थेट इस्त्रायलवर जोरदार पलटवार केला आहे. इराणकडून तेल अवीव, यरुशलेमसह इस्त्रायलच्या अनेक प्रमुख शहरांवर रॉकेट हल्ले करण्यात आले असून, यामुळे संपूर्ण इस्त्रायलमध्ये तणावाचं वातावरण निर्माण झालं आहे. हल्ल्याच्या ठिकाणी जोरदार स्फोटांचे आवाज ऐकू आले असून, नागरिकांमध्ये भीतीचं वातावरण पसरलं आहे. तेल अवीव आणि यरुशलेम शहरांमध्ये सतत हवाई अलर्ट जारी करण्यात आले आहेत. या हल्ल्यांमुळे मध्यपूर्वेतील संघर्ष अधिक धोकादायक वळणावर गेला आहे. इराणकडून मिळालेल्या प्रतिक्रियेत हा हल्ला अमेरिकेच्या आक्रमणाला प्रत्युत्तर म्हणून करण्यात आल्याचं म्हटलं जातं. दरम्यान, इस्त्रायलच्या संरक्षण दलांनीही तातडीने प्रतिउत्तर देण्याची तयारी दर्शवली आहे. या पार्श्वभूमीवर जागतिक स्तरावर चिंता व्यक्त होत असून, संयुक्त राष्ट्रसंघाने संयम बाळगण्याचं आवाहन केलं आहे. पुढील काही तास आणि दिवस हे संपूर्ण मध्यपूर्वसाठी निर्णायक ठरणार आहेत.