ठाण्यातील ठाकरे सेनेचे कार्यकर्ते पूर्णेकर हत्या प्रकरणानं राजकीय नेत्यांच्या सुरक्षिततेचा प्रश्न ऐरणीवर आला असतानाच, छत्रपती संभाजीनगरमधील एमआयएम नेते इम्तियाज जलील यांना पत्राद्वारे जीवे मारण्याची धमकी देण्यात आली आहे. जलील यांना हे धमकीचे पत्र त्यांच्या कार्यालयात मिळाले आहे. जलील यांनी हे पत्र पोलिसांकडे दिले आहे. या धमकीच्या पत्रामुळं राजकीय वर्तुळात खळबळ उडाली आहे.

सत्ताधाऱ्यांच्या विरोधात बोलणार नाही किंवा नेत्यांच्या विरोधात बोलणार नाही म्हणून अशा प्रकारच्या धमक्या दिल्या जातात, भीती दाखवली जाते. पण जे चुकीचे आहे त्याविरोधात बोलणारच आहे. काही दिवसांपूर्वीच एक पत्र माझ्या कार्यालयात आले होते. ते पत्र मी पोलिसांकडे दिले आहे. काही माहिती आहे ती पोलिसांना दिली आहे. अशा धमक्यांमुळं मी शांत बसेल असे जर वाटत असेल तर, कदाचित ते मला ओळखत नसावेत.