राज्यात गुन्हेगारी बोकाळली असून, दररोज कुठे न कुठे हल्ल्याच्या घटना घडत आहेत. हिंगोली शहरातही भयंकर घटना घडली आहे. शहरात सहा जणांच्या टोळक्याने एका तरुणावर जीवघेणा चाकूहल्ला केला आहे. जवाहर रोड परिसरात ही धक्कादायक घटना घडली. दिवसाढवळ्या करण्यात आलेल्या या हल्ल्याचा थरार सीसीटीव्ही कॅमेऱ्यात कैद झाला आहे.

या घटनेत चाकूहल्ला झालेल्या तरुणाचे नाव विनोद बेंगाळ असे आहे. आरोपींनी या तरुणावर पूर्वीच्या गुन्ह्यातील तक्रार मागे न घेतल्याच्या कारणावरून हल्ला केल्याची माहिती पोलीस तपासात पुढे आली आहे. दरम्यान या प्रकरणी हिंगोली शहर पोलिसांनी सहा जणांविरोधात खुनाचा प्रयत्न केल्याचा गुन्हा दाखल केला. यातील काही आरोपींना ताब्यात घेतल्याचे समजते.