छंदासाठी माणूस किती पुढे जातो याचं उदाहरण म्हणजे हिमाचल प्रदेशातील संजीव कुमार. त्यांनी केवळ १ लाख रुपयांची स्कूटी खरेदी केली असून, मात्र तिच्यासाठी तब्बल १४ लाख रुपयांचा व्हिआयपी नंबर विकत घेतला आहे.

HP21C-0001 हा खास नंबर मिळवण्यासाठी परिवहन विभागाने लिलावाचं आयोजन केलं होतं. या लिलावात फक्त दोनच स्पर्धक होते. सोलन जिल्ह्यातील दुसऱ्या स्पर्धकाने १३.५ लाख रुपये इतकी मोठी बोली लावली, परंतु संजीव कुमार यांनी त्यावर मात करत १४ लाखांची अंतिम बोली लावून ‘0001’ नंबर आपल्या नावावर केला.

हा क्रमांक मिळवण्यासाठी त्यांनी स्कूटीच्या किंमतीपेक्षा १४ पट अधिक रक्कम खर्च केली आहे. त्यांच्या या हटके निर्णयामुळे संजीव कुमार सध्या चर्चेचा विषय ठरत आहेत. त्यांच्या या ‘नंबर प्रेमाला’ अनेकजण आश्चर्याने आणि कौतुकाने पाहत आहेत.