मुंबईत रात्रीपासून कोसळणाऱ्या मुसळधार पावसाचा फटका मुंबईकरांना बसत आहे. या पावसामुळे पश्चिम द्रुतगती महामार्गावर वांद्रेच्या दिशेने जाणाऱ्या मार्गावर प्रचंड वाहतूक कोंडी झाली आहे. वाहनांच्या लांबच-लांब रांगा लागल्या आहेत. विलेपार्ले, अंधेरी, जोगेश्वरी, गोरेगाव, मालाड या परिसरांमध्ये वाहनांच्या लांबच लांब रांगा लागलेल्या पाहायला मिळत आहे.

आठवड्याच्या पहिल्या दिवशी मुंबईकरांना या वाहतूक कोंडीचा मोठा फटका बसलाय. कामावर जाण्यासाठी मुंबईकरांना उशिर होत आहे. या वाहतूक कोंडीमुळे एकाच ठिकाणी बराच वेळ अडकून राहिल्यामुळे मुंबईकरांना आज ऑफिसमध्ये लेटमार्क लागण्याची शक्यता आहे. या वाहतूक कोंडीमुळे मुंबईकर हैराण झाले आहेत. विलेपार्ले ते मालाडचा अर्धा तासाचा प्रवास तब्बल अडीच तासांत पूर्ण होत असल्याचे चित्र आहे. ट्राफिक पोलिसांकडून वाहतूक कोंडी सोडवण्याचे प्रयत्न सुरू आहेत.