सोलापूर: ऐन दिवाळीच्या तोंडावर सोलापुरातील समर्थ सहकारी बँकेवर भारतीय रिझर्व्ह बँकेने (RBI) निर्बंध आणल्यानंतर ठेवीदारांमध्ये खळबळ उडाली आहे. या निर्णयाची माहिती मिळताच पैसे काढण्यासाठी ठेवीदारांनी थेट बँकेत धाव घेतली. मात्र, निर्बंधांमुळे सध्या कोणतेही पैसे काढता येणार नाहीत, असे उत्तर बँक कर्मचाऱ्यांकडून दिलं जात असल्याने ठेवीदारांमध्ये धास्तावले आहे. बँकेसमोर महिलांचा आणि ज्येष्ठ नागरिकांचा लांबच लांब रांगा लागल्या असून, अनेक ठेवीदारांच्या डोळ्यात अश्रू तरळले आहेत. आधीच अतिवृष्टीमुळे शेती वाहून गेलीय, मागच्या वर्षीच्या उसाचे पैसे नुकतेच जमा झाले होते, पण आता तेच पैसे बँकेत अडकले, अशी भावना एक शेतकरी व्यक्त करताना दिसला. अनेक ठेवीदारांना रुग्णालयातील खर्च, मुलांच्या शिक्षणाचे पैसे, वैयक्तिक गरजा अशा कारणांसाठी पैसे हवे आहेत. पण अचानक आलेल्या निर्बंधांमुळे सर्वच जण हतबल झाले आहेत.