India’s CDS Gen Anil Chauhan : भारताचे संरक्षण दलप्रमुख (सीडीएस) जनरल अनिल चौहान यांनी ऑपरेशन सिंदूर दरम्यान भारतीय हवाई दलाला सुरुवातीच्या टप्प्यात तोटे सहन करावे लागल्याचे मान्य केले. सिंगापूरमधील शांग्री-ला डायलॉग सुरक्षा परिषदेत बोलताना त्यांनी सांगितले की, ७ मे रोजी झालेल्या चकमकीत भारताने काही हवाई नुकसान सोसले, परंतु पाकिस्तानचा सहा भारतीय लढाऊ विमाने पाडल्याचा दावा त्यांनी "पूर्णपणे चुकीचा" ठरवला. चौहान यांनी स्पष्ट केले की, नुकसानानंतर भारताने आपली रणनीती सुधारली आणि ८ व १० मे रोजी पाकिस्तानातील हवाई तळांवर अचूक हल्ले केले. ऑपरेशन सिंदूर हे २२ एप्रिलच्या पहलगाम दहशतवादी हल्ल्याला प्रत्युत्तर म्हणून सुरू करण्यात आले होते, ज्यामध्ये २६ नागरिकांचा मृत्यू झाला होता. भारताने यशस्वीपणे दहशतवादी तळ उद्ध्वस्त केले.

भारताचे संरक्षण दलप्रमुख (सीडीएस) जनरल अनिल चौहान यांनी ऑपरेशन सिंदूर दरम्यान भारतीय लढाऊ विमानांच्या नुकसानीबाबत पाकिस्तानच्या दाव्यांना खोटे ठरवले. पाकिस्तानने दावा केला होता की, त्यांनी या कारवाईत भारतीय हवाई दलाची सहा लढाऊ विमाने पाडली. मात्र, ब्लूमबर्ग टीव्हीला दिलेल्या मुलाखतीत जनरल चौहान यांनी हे दावे निराधार आणि चुकीचे असल्याचे स्पष्ट केले. त्यांनी सांगितले, "लढाईत नुकसान हे अपरिहार्य आहे, परंतु महत्त्वाचे म्हणजे आम्ही आमच्या चुका ओळखल्या आणि त्यातून सुधारणा केल्या."