गडचिरोलीच्या भामरागडमधील वैनगंगा नदीला पूर आल्यामुळे जनजीवन विस्कळीत झाले आहे. पूरस्थिती तिसऱ्या दिवशीही कायम आहे. हळूहळू पूर ओसरायला सुरुवात झाली आहे. तर दुसरीकडे गोसेखुर्द धरणातून मोठ्या प्रमाणात पाण्याचा विसर्ग सुरू असल्यामुळे वैनगंगा नदीने पात्र सोडले आहे. परिणामी शेकडो हेक्टर शेती पाण्याखाली गेली आहे.

गडचिरोली-नागपूर, गडचिरोली-चामोर्शी, आल्लापल्ली-भामरागड या तीन राष्ट्रीय महामार्गसह आरमोरी - रामाळा हा प्रमुख मार्ग बंद झाला आहे. गोसेखुर्द धरणातून आताही १२ ते १४ हजार क्यूसेस पाण्याचा विसर्ग सुरू असल्याने गडचिरोलीतील पूरस्थिती आज दिवसभर कायम राहण्याची शक्यता आहे. दरम्यान मंगळवारी दुपारपासून पाऊस थांबला असल्याने नागरिकांना काहीसा दिलासा मिळाला आहे.

गडचिरोलीपाठोपाठ भंडारा जिल्ह्यातही तिच परिस्थिती आहे. भंडारा जिल्ह्यात गेल्या दोन दिवसांपासून पडणाऱ्या मुसळधार पावसामुळे नदी नाले ओसंडून वाहत आहेत. भंडारा जिल्ह्यातील जीवनदायी समजली जाणारी वैनगंगा नदीने देखील धोक्याची पातळी ओलांडली आहे. जिल्ह्यातील अनेक नदी नाल्यांना पूर आलेला आहे. भंडारा तालुक्यातील खमारी गावाजवळील छोटा पूल हा पाण्याखाली गेला असून जवळपास २५ गावांचा संपर्क तुटलेला आहे.

नाल्यावरील पुलावरून तीन ते चार फूटांपर्यंत पाणी वाहत आहे. असे असताना सुद्धा काही नागरिक आपला जीव धोक्यामध्ये घालून या पाण्यातून दुचाकी, सायकल आणि पायी जात असल्याचे चित्र पाहायला मिळत आहे. या पूर परिस्थितीमध्ये प्रशासनाच्या वतीने खबरदारी म्हणून या ठिकाणी पोलिस कर्मचाऱ्यांची नियुक्ती करण्यात आलेली नसल्याचे चित्र दिसत आहे. तर महाराष्ट्र मध्य प्रदेश सीमेवर असलेल्या बावनथडी नदीला सुद्धा पूर आल्यामुळे दोन्ही राज्याच्या संपर्क तुटलेला आहे.