संजय महाजन, जळगाव | साम टीव्ही

राज्यात ठिकठिकाणी पेट्रोल-डीझेल टंचाईचा सामना करावा लागत आहे. काल बुलढाण्यातील लोणारमध्ये पेट्रोल पंपावर डीझेलसाठी शेतकऱ्यांची झुंबड उडाली होती. हातात कॅन घेऊन शेतकरी पंपाकडे पळत सुटल्याचे त्या व्हिडिओमध्ये दिसून आले होते. इंधन टंचाईचा सामना करावा लागलेल्या शेतकऱ्यांसमोर आता मोठं आव्हान उभं राहिलं आहे. आता चाळीसगावमध्ये शेतकऱ्यांनी पेट्रोल-डीझेलसाठी चक्क आंदोलन केले. कॅनमध्ये पेट्रोल डीझेल देत नसल्याने शेतकरी आक्रमक झाले. त्यांनी जळगाव-चांदवड रस्ता अडवला.

पेट्रोल-डीझेलचा काळाबाजार होत असल्याचे निदर्शनास आल्यानंतर जिल्हाधिकाऱ्यांनी यासंदर्भात आदेश काढले आहेत. कॅन किंवा ड्रममध्ये पेट्रोल-डीझेल द्यायचे नाही, असे त्यात नमूद करण्यात आले आहे. यानंतरही शेतकरी कॅन घेऊन पंपांवर पोहोचले. तिथे प्रचंड गर्दी झाली होती. मात्र, कॅनमध्ये पेट्रोल-डीझेल देण्यात आले नाही. त्यामुळे शेतकऱ्यांनी संताप व्यक्त केला. ट्रॅक्टर शेतावर असतात. ते पंपावर आणण्यासाठी वेगळे डीझेल लागते. त्यामुळे कॅनमध्येच डीझेल द्यावा, अशी शेतकऱ्यांची मागणी आहे. आमच्या शेतमालाला भाव नाही. तसेच जिथे-तिथे शेतकऱ्यांना रांगेत उभं राहावे लागते, अशी व्यथाही शेतकऱ्यांनी बोलून दाखवली.