महाराष्ट्राच्या राजकारणाला पुन्हा एकदा हादरवून सोडणारी आणि थेट दिल्लीच्या सत्ताकारणाशी जोडलेली एक अत्यंत मोठी बातमी समोर आली आहे. ठाकरे गटाच्या खासदारांना आपल्या गळाला लावण्यासाठी राबवण्यात आलेल्या शिवसेनेच्या 'ऑपरेशन टायगर'चे अत्यंत गोपनीय फोटो अखेर समोर आले असून ते 'साम टीव्ही'च्या हाती लागले आहेत. या फोटोंनी महाराष्ट्राच्या राजकारणात पुन्हा एकदा खळबळ उडवून दिली आहे.

पहाटेच्या 'त्या' गुप्त बैठकीचे चित्र स्पष्ट!

समोर आलेल्या एक्स्क्लुझिव्ह फोटोंनुसार, १७ जूनच्या पहाटे ठाकरे गटाचे ६ खासदार थेट लोकसभा अध्यक्ष ओम बिर्ला यांच्या दिल्लीतील अधिकृत निवासस्थानी पोहोचल्याचे स्पष्ट दिसत आहे. मुख्यमंत्री एकनाथ शिंदे यांचे सुपुत्र खासदार डॉ. श्रीकांत शिंदे आणि आमदार प्रताप सरनाईक यांच्या थेट उपस्थितीत हा संपूर्ण राजकीय थरार पार पडला. पहाटेच्या वेळी अत्यंत गुप्तपणे राबवलेल्या या राजकीय मोहिमेचे (Mission) संपूर्ण चित्र आता या फोटोंमुळे जगासमोर आले आहे.