संजय जाधव , बुलढाणा | साम टीव्ही

देशात पेट्रोल-डीझेलचा पुरेसा साठा आहे, असं सरकारकडून सांगितलं जात आहे. मात्र, बुलढाण्यातील लोणारमध्ये इंधन टंचाईचे चटके शेतकऱ्यांना सोसावे लागत असल्याचे दिसते. डीझेल टंचाईमुळं शेतकरी हवालदिल झाला आहे. लोणार शहरात परिस्थिती अधिकच गंभीर आहे. अनेक पेट्रोल पंपांवर तासनतास रांगा लागत आहेत. जिथे डीझेल मिळेल तिथे शेतकरी धाव घेत आहेत. सध्या शेती मशागतीची अत्यंत महत्त्वाची वेळ असताना डीझेलअभावी ट्रॅक्टर आणि शेतीची अवजारे बंद पडली आहेत. परिणामी शेतातील मशागतीची कामे पूर्णपणे ठप्प झाली असून आगामी १० दिवसांनंतर होणारी पेरणीही धोक्यात आली आहे. एकीकडे पावसाच्या तोंडावर शेतकरी तयारीत असताना दुसरीकडे डीझेल टंचाईने बळीराजाचे कंबरडे मोडले आहे. जिल्हाभर डीझेलचा तुटवडा निर्माण झाल्याने ग्रामीण भागात चिंतेचं वातावरण आहे. प्रशासन आणि सरकारविरोधात संताप व्यक्त केला जात आहे. शेती करायची कशी आणि पेरणीची तयारी करायची कशी?” असा संतप्त सवाल आता शेतकरी विचारत आहेत. कमळजा पेट्रोल पंपावर हातात कॅन घेऊन धाव घेणाऱ्या शेतकऱ्यांचा व्हिडिओ व्हायरल होत आहे. यामुळे पेट्रोल-डीझेल टंचाईचं भीषण वास्तव समोर आलं आहे.