धाराशिव जिल्ह्यातील भूम तालुक्यातील साबळेवाडी येथे पाझर तलाव फुटल्याने शेतकऱ्यांवर मोठं संकट ओढवलं आहे. तलाव फुटल्यानंतर शेकडो एकर शेती पाण्याखाली गेली असून उभं पीक मातीमोल झालं आहे. या दुर्घटनेमुळे जमिनीत मोठ्या प्रमाणात दगडगोट्यांचा खच झाला आहे. शेतकऱ्यांच्या शेतातून जाणाऱ्या पाईपलाईन उघड्या पडल्या असून अनेक विहिरी बुजल्याच्या घटना समोर आल्या आहेत. त्यामुळे शेतकऱ्यांचे लाखो रुपयांचे नुकसान झाले आहे. दरम्यान तलावाचे काम निकृष्ट दर्जाचे असल्याचा आरोप स्थानिकांनी केला आहे. तलावाची गुणवत्ता योग्यप्रकारे तपासली गेली नाही, त्यामुळेच ही फूट झाली, असा शेतकऱ्यांचा दावा आहे. घटनेची चौकशी स्वतंत्र समितीमार्फत करावी, दोषींवर कठोर कारवाई व्हावी, अशी मागणी देखील ग्रामस्थांकडून करण्यात येत आहे.