अक्षय बडवे, साम टीव्ही

पुण्यातील गणेशोत्सवाचे आकर्षण असलेल्या श्रीमंत दगडूशेठ हलवाई सार्वजनिक गणपती मंडळाकडून यंदा केरळमधील श्री पद्मनाभ स्वामी मंदिराची प्रतिकृती साकारण्यात येतेय. भारतातील केरळ राज्याची राजधानी असलेल्या तिरुअनंतपुरम येथे भगवान विष्णूंना समर्पित असे एक हिंदू मंदिर म्हणजे पद्मनाभस्वामी मंदिर. अत्यंत पवित्र असलेल्या या मंदिराची तेजस्वी प्रतिकृती यंदाच्या गणेशोत्सवात साकारण्यात आली आहे. मुख्य गाभाऱ्यात विष्णू लक्ष्मी, शिवपार्वती, श्रीकृष्ण आणि नृसिंह यांच्या मूर्ती आहेत. मंदिराची प्रतिकृती सुमारे तब्बल १०० फूट आहे. गणेश चतुर्थीला सकाळी ११ वाजून ११ मिनिटांनी बाप्पाची प्राणप्रतिष्ठापना होणार आहे. तर, मंदिरावरील विद्युतरोषणाईचे उद्घाटन सायंकाळी ७ वाजता होईल आणि सुरक्षेच्या कारणास्तव देखाव्याच्या परिसरात सीसीटिव्ही कॅमेरे बसविण्यात आले आहेत.