राहुल गांधी यांच्या विरोधात केलेल्या वक्तव्याच्या निषेधार्थ काँग्रेसने भाजप विरोधात आंदोलनाला सुरुवात केली आहे. भाईंदरमध्ये प्रदेशाध्यक्ष नाना पटोले यांच्या नेतृत्वात हे आंदोलन सुरू आहे.

लोकसभेतील विरोधी पक्षनेते राहुल गांधी यांच्या आरक्षणसंदर्भातील वक्तव्यावरून सध्या वाद सुरू आहेत. या पार्श्वभूमीवर राहुल गांधी यांच्यावर शिंदे गटाचे आमदार संजय गायकवाड यांनी राहुल गांधी यांच्यावर गंभीर टीका केली होती. त्यानंतर बुधवारी भारतीय जनता पक्षाचे खासदार डॉ. अनिल बोंडे यांनी राहुल गांधी यांची जीभ छाटू नये तर त्यांच्या जिभेला चटके दिले पाहिजे असं वादग्रस्त वक्तव्य केलं. त्यामुळे काँग्रेसने आक्रमक पवित्र घेत बोंडे यांच्याविरोधात गुन्हा दाखल केला होता. त्यानंतर गुरुवारी काँग्रेसने राज्यभरात सर्वत्र भाजप विरोधात जोडे मारो आंदोलन सुरू केलं आहे. त्याच पार्श्वभूमीवर मुंबईतील भाईंदरमध्ये काँग्रेस कार्यकर्त्यांनी नाना पाटोले यांच्या नेतृत्वात आंदोलन सुरू केलं आहे. यावेळी जोरदार घोषणाबाजी करून भाजपचा निषेध करण्यात आला.