काँग्रेसच्या खासदार वर्षा गायकवाड यांच्या नेतृत्वात पक्षाचे नेते, पदाधिकारी आणि कार्यकर्त्यांनी आज मुंबईत ईडी कार्यालयाबाहेर आंदोलन केलं. अदानी समूहानं शेअर, रिअल इस्टेट क्षेत्रात घोटाळा केल्याचा आरोप आंदोलकांनी केला आहे. या घोटाळ्याची चौकशी करण्याची मागणी त्यांनी मोर्चाद्वारे केली.

मुंबई काँग्रेसच्या अध्यक्षा असलेल्या वर्षा गायकवाड यांच्या नेतृत्वात ईडी कार्यालयावर मोर्चा काढण्यात आला. या ठिकाणी घोषणाबाजी करण्यात आली. ईडीच्या कार्यालयाजवळच पोलिसांचा मोठा फौजफाटा तैनात होता. ईडी कार्यालयाजवळ पोहोचण्याआधीच वर्षा गायकवाड आणि काँग्रेस कार्यकर्त्यांना रोखण्यात आलं.

यावेळी वर्षा गायकवाड यांनी संताप व्यक्त केला. अदानी समूहानं घोटाळा केल्याचा आरोप त्यांनी केला. या घोटाळ्यांची चौकशी करण्याची जबाबदारी ईडीची आहे. चौकशीची मागणी करण्याचा अधिकार आम्हाला नाही का? आम्हाला रोखण्यात येतं, अशा शब्दांत त्यांनी संताप व्यक्त केला. राज्य सरकारचा आम्ही निषेध करतो, असंही त्या म्हणाल्या. आम्हाला का जाऊ देत नाहीत, असा सवालही त्यांनी पोलिसांना विचारला.