स्थानिक स्वराज्य संस्थांच्या निवडणुकीच्या पार्श्वभूमीवर राजकीय घडामोडींना वेग आला आहे. मुंबईमध्ये आज कॉँग्रेसपक्षाची बैठक पार पडली. या बैठकीत महाविकास आघाडी म्हणून न लढता आपण स्वबळावर लढू असा नारा देण्यात आला. तसेच ठाकरे बंधूंसोबत युती केल्यास केवळ त्यांनाच फायदा होईल असे मत मुंबईतील कॉँग्रेसच्या नेत्यांनी मांडले आहे. महानगरपालिकेच्या पार्श्वभूमीवर मुंबई येथील सांताक्रूझच्या गलेक्सी हॉटेलमध्ये कॉँग्रेस पक्षाची बैठक पार पडली. सूत्रांनी दिलेल्या माहितीनुसार, विधानसभेत कॉँग्रेसच्या मतांमुळे ठाकरेसेनेला फायदा झाला. अल्पसंख्यांक मत कॉँग्रेसपासून दूर जात असून ती ठाकरेंकडे वळतायत अशी भीती देखील कॉँग्रेसच्या नेत्यांनी व्यक्त केली आहे.