NEET परीक्षेचा पेपर फुटल्यानंतर या प्रकरणात नाशिक कनेक्शन समोर आले. या प्रकरणी दुपारी नाशिक पोलिसांनी शुभम खैरनार या व्यक्तीला शहरातील इंदिरा नगर पोलीस ठाण्याच्या हद्दीतून ताब्यात घेतले. हे संपूर्ण प्रकरणाची राजस्थान पोलीसांकडून चौकशी सुरू आहे. या घटनेचे गांभीर्य लक्षात घेता CBI चे पथक नाशिकमध्ये दाखल झाले असून शुभम खैरनारचा ताबा नाशिक पोलिसांकडून घेऊन त्याला दिल्लीला घेऊन जाणार असल्याची माहिती प्राप्त होत आहे.

३ मे रोजी झालेली NEET परीक्षा रद्द झाल्यानंतर विद्यार्थ्यांमध्ये मोठी चिंता आणि संभ्रमाचे वातावरण निर्माण झाले आहे. या परीक्षेसाठी विद्यार्थ्यांनी वर्षभर कठोर मेहनत घेत तयारी केली होती. परीक्षा पार पडल्यावर अनेक विद्यार्थी आपल्या गावी परतले. तर काही जण पालकांसोबत परदेश दौऱ्यावरही गेले आहेत. मात्र परीक्षा रद्द झाल्याच्या निर्णयानंतर आता पुढे काय होणार, पुन्हा परीक्षा कधी होणार, याबाबत विद्यार्थ्यांसमोर मोठा प्रश्न निर्माण झाला आहे.