धुळे तालुक्यातील देवभाने परिसरात मुंबई-आग्रा महामार्गावर धक्कादायक घटना घडली आहे. इंदोरकडे जाणारी खाजगी बस अचानक भररस्त्यात पेटली. सुरुवातीला बसच्या टायरला आग लागल्याचं लक्षात येताच चालकाने प्रसंगावधान राखून तात्काळ बस थांबवली आणि सर्व प्रवाशांना सुरक्षितपणे बाहेर काढले. यामुळे मोठा अनर्थ टळला आहे.

घटनेची माहिती मिळताच अग्निशमन विभागाच्या जवानांनी तत्काळ घटनास्थळी धाव घेतली असून, आग विझवण्याचे प्रयत्न सुरू केले आहेत. सुदैवाने या घटनेत कोणतीही जीवितहानी झालेली नाही.या घटनेमुळे काही वेळ महामार्गावरील वाहतूक विस्कळीत झाली होती. दरम्यान, आग लागण्याचे नेमके कारण अद्याप अस्पष्ट असून, यासंदर्भात अधिक तपास सुरू आहे.