मागील वर्षी विधानसभेच्या निवडणुका झाल्या. या निवडणुकीत भाजप, राष्ट्रवादी काँग्रेस आणि शिवसेना शिंदे गट यांच्या महायुतीने विजय मिळवला. राज्यात सरकार स्थापन झालं. आता यापुढील काळात राज्यातील स्थानिक स्वराज्य संस्थांच्या निवडणुका होण्याची शक्यता आहे. मिनी विधानसभा म्हणून ओळखल्या जाणाऱ्या महापालिकांच्या निवडणुकाही होण्याची शक्यता आहे. त्यामुळे राजकीय पक्षांनी निवडणुकांची तयारी सुरू केलेली दिसून येते. त्यादृष्टीने योजना आखण्यात येत आहेत.

राज्यातील सत्ताधारी असलेल्या भाजपने देखील मुंबई महापालिका निवडणुकीसाठी मोर्चेबांधणी सुरू केली आहे. मुंबईतील ३६ विधानसभा मतदारसंघांसाठी १०८ मंडल अध्यक्ष निवडण्यात येणार आहेत. कोअर कमिटीच्या आजच्या बैठकीत मंडल अध्यक्षांच्या नावावर शिक्कामोर्तब होणार आहे. या पदांसाठी ३५ ते ४५ या वयोगटातील तरुणांना आणि महिलांना संधी देण्यात येणार आहे, असे सांगितले जाते.