जिल्हा परिषद सत्तासंघर्षात भाजपने आपली ताकद दाखवत सातारा जिल्हा परिषदेवर झेंडा रोवला आहे. संख्याबळाच्या जोरावर भाजपने अध्यक्ष आणि उपाध्यक्ष ही दोन्ही महत्त्वाची पदे आपल्या ताब्यात घेतली. भाजपच्या प्रिया शिंदे यांची अध्यक्षपदी, तर राजू भोसले यांची उपाध्यक्षपदी निवड करण्यात आली. दुसरीकडे राष्ट्रवादी काँग्रेस आणि शिवसेना यांना अपेक्षित संख्याबळ दाखवण्यात अपयश आले.

या विजयामागे सार्वजनिक बांधकाम मंत्री शिवेंद्रसिंहराजे भोसले आणि ग्रामविकास मंत्री जयकुमार गोरे यांची रणनीती महत्त्वाची ठरल्याचे बोलले जात आहे. तसेच पर्यटन मंत्री शंभूराजे देसाई आणि मदत व पुनर्वसन मंत्री मकरंद पाटील यांनीही महत्त्वाची भूमिका बजावली. राष्ट्रवादीचे प्रदेशाध्यक्ष शशिकांत शिंदे यांना धक्का देत भाजपने साताऱ्यात सत्ता काबीज केली. दरम्यान, मतदान प्रक्रियेदरम्यान तणावपूर्ण वातावरण निर्माण झाले. सदस्य आत प्रवेश करत असताना पोलिस आणि कार्यकर्त्यांमध्ये धक्काबुक्की झाल्याची घटना घडली. या गोंधळात शंभूराजे देसाई जखमी झाल्याची चर्चा असून, तत्काळ वैद्यकीय पथक जिल्हा परिषदेत दाखल झाले. संपूर्ण घटनेमुळे सातारा जिल्हा परिषद परिसरात काही काळ तणावाचे वातावरण निर्माण झाले होते.