विधानसभा निवडणूक जाहीर झाली आणि राजकीय रणांगणावर फटाक्यांची आतषबाजी सुरू झाली आहे. निवडणूक प्रचाराची रणधुमाळी आणि दुसरीकडे दररोज कुठे न कुठे, कोणत्या न कोणत्या राजकीय पक्षात नेते, पदाधिकारी, कार्यकर्त्यांच्या प्रवेशाचे 'आपटीबॉम्ब' फुटत आहेत. महाविकास आघाडी, तसेच महायुतीतील मित्रपक्षांमध्ये जागावाटपाच्या चर्चेचा सिलसिला सुरू आहे. उमेदवारी अर्ज भरण्याची अंतिम मुदत जवळ आली तरी, अद्याप महाआघाडी आणि युतीच्या जागावाटपाचा फॉर्म्युला निश्चित झालेला नाही. ही चर्चा अद्याप अंतिम टप्प्यातच आहे. महायुतीच्या फॉर्म्युलावर शिक्कामोर्तब झालं नसलं तरी, तो निश्चित झाल्याचे सूत्रांचे म्हणणे आहे. त्यानुसार, भाजप १५३, शिंदे गट ८० आणि अजित पवार गट ५५ जागा लढण्याची शक्यता व्यक्त केली जात आहे.

भाजप मुंबईत १८ जागा लढण्याची शक्यता आहे. १४ जागांवर उमेदवार निश्चित करण्यात आले आहेत. अद्याप ४ जागांवर चर्चा करायची आहे.

बोरीवली, दहीसर, कांदीवली पूर्व, चारकोप, गोरेगाव, वर्सोवा, अंधेरी पश्चिम, मुलुंड, घाटकोपर पश्चिम, घाटकोपर पूर्व, विलेपार्ले, वांद्रे पश्चिम, सायन कोळीवाडा, वडाळा, मलबार हिल, कुलाबा, कलिना, मालाड पश्चिम या १८ जागांवर भाजप निवडणूक लढवणार असल्याचे सांगण्यात येत आहे.