ठाकरे सेनेचे नेते विनोद घोसाळकर यांनी भाजप आणि राष्ट्रीय स्वयंसेवक संघावर (RSS) गंभीर आरोप केले आहेत. बाळासाहेब ठाकरे यांच्या निधनानंतर दिल्लीत झालेल्या एका बैठकीत शिवसेना संपवण्याचा कट रचण्यात आला होता, असा दावा घोसाळकर यांनी केला आहे. 'उद्धव ठाकरे लढणारे नेते नाहीत, त्यामुळे हिंदुत्वामध्ये वाटेकरी नको', अशी भूमिका या बैठकीत ठरवण्यात आली होती, असा गौप्यस्फोटही त्यांनी केला. घोसाळकर यांच्या मते, हा कट केवळ वैचारिक पातळीवर नव्हता, तर पक्ष फोडण्यासाठी पंतप्रधान नरेंद्र मोदी आणि अमित शहा यांनी एकनाथ शिंदे यांना थेट बळ दिले. या दाव्यांमुळे महाराष्ट्राच्या राजकारणात खळबळ उडाली असून, भाजप आणि शिंदे गटाकडून यावर अद्याप प्रतिक्रिया आलेली नाही.