हरियाणा आणि जम्मू काश्मीर निवडणुकांच्या पार्श्वभूमीवर भाजपअध्यक्ष जे. पी. नड्डा यांनी महत्वाची बैठक बोलावली आहे. या बैठकीला भाजपचे सर्व महासचिव उपस्थित राहणार आहेत. या बैठकीत नेमकी काय खलबतं होतात हे बघणं महत्वाचं ठरणार आहे.

हरियाणा आणि जम्मू काश्मीर येथील निवडणुकांच्या मतमोजणीला मंगळवारी सकाळीच सुरुवात झाली आहे. यात हरियाणामध्ये सकाळच्या सत्राच्या मतमोजणीत कॉंग्रेसच्या मतांची आकडेवारी अधिक असल्याचं दिसून आलं आहे. मात्र काही वेळापासून भाजप पुन्हा कमबॅक करताना दिसत आहे. त्याच पार्श्वभूमीवर ही महत्वाची बैठक घेण्यात येणार आहे. भाजपअध्यक्ष जे. पी. नड्डा यांनी भाजपच्या आठ महासचिवांची ही महत्वाची बैठक बोलावली आहे. निवडणुकीनंतर नेमके कसे परिणाम असतील यावर या बैठकीत चर्चा केली जाणार असल्याचं सांगण्यात येत आहे. महाराष्ट्रातून राष्ट्रीय महासचिव विनोद तावडे हे देखील या बैठकीत उपस्थित राहणार आहेत. सरकार कसं बनवायचं या अनुषंगाने जे. पी. नड्डा या बैठकीत चर्चा करू शकतात असं देखील सांगण्यात येत आहे.