वसई पश्चिमेकडील बाभोळा परिसरात आयोजित करण्यात आलेल्या स्वयं पुनर्विकास मार्गदर्शन शिबिरादरम्यान एक धक्कादायक प्रकार घडला. भाजपचे नेते तथा आमदार प्रवीण दरेकर हे या शिबिराला उपस्थित राहण्यासाठी आले असता लिफ्टमध्ये सुमारे १५ ते २० मिनिटे अडकून पडले. ही घटना वसईच्या आमदार स्नेहा दुबे पंडित यांनी आयोजित केलेल्या कार्यक्रमात घडली. कार्यक्रमाच्या ठिकाणी पोहोचण्यासाठी दरेकर लिफ्टने वर जात असताना अचानक लिफ्ट बंद पडली. त्यांच्यासोबत काही कार्यकर्तेही लिफ्टमध्ये होते.

सुमारे पंधरा मिनिटांच्या प्रयत्नांनंतर लिफ्टचा दरवाजा उघडण्यात आला आणि त्यांना सुखरूप बाहेर काढण्यात आले. या घटनेमुळे कार्यक्रमस्थळी एकच खळबळ उडाली. सुरक्षा व्यवस्थेबाबत आणि लिफ्टच्या देखभालीबाबत प्रश्नचिन्ह उपस्थित करण्यात येत आहे. खुद्द आमदार अडकले असतानाही जर अशी परिस्थिती निर्माण होत असेल, तर सामान्य नागरिकांच्या सुरक्षेचं काय, असा सवाल आता उपस्थित होतोय.