महापालिका निवडणुकांचा निकाल जाहीर झाला आहे. राज्यात २९ महापालिका निवडणुकांमध्ये भाजप हा सर्वात मोठा पक्ष ठरला आहे. आता जिल्हा परिषदा आणि पंचायत समिती निवडणुका होत आहेत. या निवडणुकांसाठी राज्यातील प्रमुख पक्षांनी तयारी सुरू केली आहे. अनेक ठिकाणी इच्छुकांच्या मुलाखतींचा कार्यक्रम सुरू झाला आहे. या निवडणुकांची रणधुमाळी सुरू झाली असतानाच, राज्याच्या राजकारणात आणखी एका पक्षाची एन्ट्री झाली आहे.

जिल्हा परिषद आणि पंचायत समिती निवडणुकांसाठी नवा पक्ष रणांगणात उतरला आहे. ओबीसी बहुजन आघाडी हा पक्ष निवडणुका लढणार आहे. राज्यातील १२ जिल्हा परिषदा आणि १२५ पंचायत समित्यांच्या निवडणुका या पक्षाच्या माध्यमातून लढवल्या जाणार आहेत, अशी घोषणा ओबीसी नेते प्रकाश शेंडगे यांनी पत्रकार परिषदेत केली.

या महाराष्ट्राच्या इतिहासात पहिल्यांदा ओबीसी बहुजन आघाडी हा पक्ष कार्यकर्त्यांना त्यांचं राजकीय व्यासपीठ देणार आहे. कार्यकर्त्यांच्या उमेदवारीचा प्रश्न कायमचा सुटणार आहे. ज्यांना तिकीट हवं असेल तर त्यांनी तात्काळ संपर्क साधावा. त्यांना एबी फॉर्म घरपोच पोहोचवण्याचं काम केलं जाईल, असे शेंडगे म्हणाले.