महापालिका निवडणुकांचा रणसंग्राम सुरू आहे. मतदान अवघ्या दोन दिवसांवर आलं आहे. त्याआधी मुंबईतील राजकीय वातावरण जास्तच तापलं आहे. राज ठाकरे आणि उद्धव ठाकरे यांच्या सभेनंतर जबरदस्त वातावरणनिर्मिती झाली आहे. ठाकरे बंधूंच्या सभेनंतर भाजपच्या नेत्यांकडून टीकेची झोड सुरू आहे. मुंबई महापालिकेवर सत्ता कुणाची येणार अशी चर्चा सुरू झाली असतानाच, निवडणुकीसाठी मुंबईत मराठा मोर्चानं ठाकरे बंधूंना पाठिंबा जाहीर केला आहे.

मुंबईत मराठा बांधव हे ठाकरे बंधूंना मतदान करण्यासाठी आवाहन करणार आहेत. मराठा आंदोलक मनोज जरांगे यांनी पोस्टरद्वारे आवाहन केले आहे. मुंबई ही ठाकरे यांच्याच हातात शोभून दिसणार, असं पोस्टर मराठा मोर्चानं प्रसिद्ध केलं आहे. जरांगेंनी पोस्टरद्वारे आवाहन केल्यानंतर मराठा मोर्चानं ठाकरे बंधूंना मुंबईत पाठिंबा दिला आहे.