बीड : महायुतीच्या उमेदवार भाजप नेत्या पंकजा मुंडे प्रचाराच्या अनुषंगाने गावात येताच, मराठा आंदोलक तरुणांनी, "एक मराठा लाख मराठा" अशा घोषणा दिल्या. हा प्रकार बीडच्या माजलगाव तालुक्यात असणाऱ्या लवूळ गावामध्ये घडला. तर या अगोदरही पंकजा मुंडे या केज तालुक्यातील पावनधाम येथे, संत तुकाराम बीज उत्सवानिमित्त गेल्या असता, त्या ठिकाणी देखील पंकजा मुंडे यांचा ताफा आडवत घोषणाबाजी करण्यात आली होती. दरम्यान पुन्हा एकदा पंकजा मुंडे यांना घोषणाबाजीचा सामना करावा लागला आहे. पंकजा मुंडे यांना भाजपच्या वतीने बीडमधून लोकसभेची उमेदवारी जाहीर करण्यात आली आहे. प्रचारादरम्यान मराठा तरुणांनी घोषणाबाजी करत पंकजा मुंडे यांच्यावर निशाणा साधलाय.