संतोष देशमुख प्रकरणी अपहरण करताना स्विफ्ट गाडी कोणाची होती? त्यांनानंतर राहायला घर कोणी दिलं? या सगळ्या गोष्टी तपासात येईल. त्यातून खंडणीमधील जे आरोपी होते ते कोणाच्या घरात, कोणी गाड्या पुरवल्या हे सगळं समोर येईल, असं बीडचे खासदार बजरंग सोनवणे यांनी म्हंटलं आहे. आज पत्रकार परिषदेत बोलताना त्यांनी संतोष देशमुख हत्या प्रकरणावरून वाल्मिक कराडवर गंभीर आरोप केले आहे.

पुढे बोलताना बजरंग सोनवणे म्हणाले की, परळी बाहेरचा विषय खूप मोठा आहे. केज मध्ये गुंडांची प्रवृत्ती झालीय. इतर आरोपींनासुद्धा मोकका लावला पाहिजे ही आमची मागणी आहे. हे प्रकरण फास्ट ट्रॅक कोर्टमध्ये चालवायला हवं, उज्वल निकम जर होकार देत नसतील तर सतीश माने-शिंदे या वकील महोदयांना हे प्रकरण द्या. धस काय म्हणतात हे मला नाही माहिती. कालपासून बीडमध्ये जमावबंदीचे आदेश लागू आहेत. हे असताना आंदोलन कसं झालं? गुंड प्रवृत्तीचे लोकांनी परळी बंद करण्याचा निर्णय घेतला. १०० टक्के मी अमित शाह यांची भेट घेतली होती. मी त्यांना सगळे वृत्तान्त देणार आहे. मी जर वाल्मीक कराड यांना धमकी दिली, तर मग एवढे दिवस का लागले बोलायला. गुंड राज होतं, आमच्या लोकांना मारायचा प्लॅन होतो. अशा गुंडांना आम्ही कशी धमकी देणार? गुन्हेगाराला कुठली ही जात नसते, काही मूठभर समाज कंटक आहेत ज्यांना जातीय रंग द्यायचा आहे. अजित पवारांनी बीडमध्ये पक्षाची कारवाई करताना थोडा उशीर केला का काय असं वाटतंय, संतोष देशमुख हत्येच्या संदर्भात जे कोणी सामील असेल या सर्वांना फाशी झाली पाहिजे. मी मागितला तर धनंजय मुंडे राजीनामा देणार आहेत का? सरकारचा प्रश्न आहे ते बघतील, असंही बजरंग सोनवणे यांनी म्हटलं आहे.