बीड: मांजरसुंबा चौकात आज दोन गट आमने-सामने आले. संतोष देशमुख हत्या प्रकरणातील आरोपी वाल्मीक कराड यांच्या समर्थनार्थ घोषणाबाजी करण्यात आल्याने परिसरात तणावाचे वातावरण निर्माण झाले.

ओबीसी नेते लक्ष्मण हाके यांच्या कार्यक्रमासाठी आलेल्या कार्यकर्त्यांनी “वाल्मीक अण्णा अंगार है, बाकी सब भंगार है, वाल्मीक अण्णा तुम आगे बढ़ो, हम तुम्हारे साथ है” अशा घोषणा देत संतोष देशमुख खून प्रकरणातील मुख्य आरोपी असलेल्या वाल्मीक कराडच्या समर्थनार्थ घोषणाबाजी केली. यावर दुसऱ्या गटाने जोरदार प्रत्युत्तर देत घोषणाबाजी सुरू केली. काही काळ रस्त्यावरच दोन्ही समाज बांधवांमध्ये घोषणाबाजीच्या माध्यमातून तणाव वाढला. मात्र पोलिसांनी वेळीच मध्यस्थी करून परिस्थिती नियंत्रणात आणली. सुदैवाने वाद आणखी चिघळण्याआधीच पोलिसांच्या हस्तक्षेपामुळे वातावरण शांत झाले. परंतु घोषणाबाजीमुळे मांजरसुंबा परिसरात बराच वेळ तणावाचे वातावरण होते.