शेतीसाठी आवश्यक असलेली बैलजोडी नसल्यामुळे बीड जिल्ह्यातील केज तालुक्यातील भटुंबा येथील शेतकऱ्यावर जु आपल्या खांद्यावर घेऊन कोळपणी करण्याची वेळ आली आहे. नामदेव मोरे असे या शेतकऱ्याचे नाव असून, त्यांचा एक व्हिडिओ सध्या सोशल मीडियावर मोठ्या प्रमाणात व्हायरल होत आहे. या व्हिडिओमध्ये मोरे आपल्या खांद्यावर जु घेऊन शेतात कोळपणी करताना दिसत आहेत, तर त्यांच्या पत्नी त्या कोळपणीच्या प्रक्रियेत त्यांना मदत करताना दिसत आहेत. ही घटना समोर येताच अनेकांनी सोशल मीडियावर भावनिक प्रतिक्रिया दिल्या असून, शासनाच्या यंत्रणांनी अशा गरजू शेतकऱ्यांपर्यंत तत्काळ मदत पोहोचवावी, अशी मागणी होत आहे. याआधी लातूर जिल्ह्यातील एका शेतकऱ्यानेही अशीच कोळपणी बैलाऐवजी स्वतःच्या खांद्यावर जु घेऊन केली होती. त्यानंतर त्या शेतकऱ्याला मदतही मिळाली होती. आता बीडच्या नामदेव मोरे यांनाही तत्काळ मदत मिळेल का? असा प्रश्न उपस्थित होत आहे.