राज्य सरकारकडून सण-उत्सवांच्या काळात प्रशासनाकडून दिल्या जाणाऱ्या आनंदाच्या शिध्याची काळ्या बाजारात विक्री केली जात असल्याचा धक्कादायक प्रकार समोर आला. अंबरनाथमध्ये हा प्रकार उघड झाला असून सामाजिक कार्यकर्त्यांनी हा प्रकार उघडकीस आणल्यानंतर शिधावाटप अधिकाऱ्यांकडून अंबरनाथच्या शिवाजीनगर पोलीस ठाण्यात गुन्हा दाखल केला आहे. शिधावाटप अधिकाऱ्यांनी संबंधित रेशन दुकानाची तपासणी करून या दुकानालाही सील ठोकलं आहे.

अंबरनाथच्या महालक्ष्मी नगर परिसरातील ४६ फ ००१ या रेशन दुकानात सरकारकडून आनंदाच्या शिध्याचं साहित्य आलं होतं. यापैकी सोयाबीन खाद्यतेलाच्या २७० लिटर तेलाच्या पिशव्या पहाटेच्या सुमारास एका खाजगी टेम्पोतून काळ्या बाजारात विक्रीसाठी नेल्या जात असल्याचं सामाजिक कार्यकर्ते प्रवीण गोसावी आणि प्रशांत उतेकर यांच्या निदर्शनास आलं. त्यानुसार शिधावाटप अधिकाऱ्यांनी घटनास्थळी येऊन तपासणी केली असता हे सरकारतर्फे देण्यात आलेल्या आनंदाच्या शिध्यामधीलच तेल असल्याचं निष्पन्न झालं. हे तेल नेमकं कुणाच्या सांगण्यावरून आणि कुठे विक्रीसाठी नेलं जात होतं? याचा तपास सध्या पोलिसांकडून केला जात आहे.